Олон улсын стандартад нийцсэн Чанарын удирдлагын тогтолцоог нэвтрүүлсэн бизнесийн байгууллага манай улсад цөөнгүй бий. Харин төрийн байгууллагуудаа манлайлан Нийгмийн даатгалын байгууллага анх удаа ISO 9001:2008 стандартыг нэвтрүүлж байгаа нь сонирхол татаж энэ сэдвээр Нийгмийн даатгалын ерөнхий газрын дарга Ц.Уртнасантай ярилцсан юм.

– Танд энэ өдрийн мэнд хүргэе. Төрийн байгууллага, тэр дундаа Засгийн газрын хэрэгжүүлэгч агентлаг хууль журмын хэрэгжилт хангуулах, төрийн үйлчилгээг хүргэх гээд ачаалал ихтэй ажилладаг. Үүний хажуугаар Олон улсын стандартад нийцсэн Чанарын удирдлагын тогтолцоо нэвтрүүлэх шинэ санаачлага гарган ажиллаж  байгаа нь олзуурхууштай санагдлаа. Ер нь яагаад ISO 9001:2008 стандартыг нэвтрүүлэх болсон бэ? Үүний ач холбогдол юунд оршиж байгаа талаар ярилцлагаа эхлэе.

Та бүхэнд энэ өдрийн мэнд хүргэе. Өнөөдөр бизнесийн байгууллагууд олон улсын чанарын удирдлагын стандартыг хэрэгжүүлж, бизнесийн нэр хүндийг өсгөж, нөгөө талаасаа хэрэглэгч, үйлчлүүлэгчдийнхээ сэтгэл ханамжийг нэмэгдүүлэх замаар зах зээл дээрх өрсөлдөх чадвараа нэмэгдүүлж байна. Яагаад төрийн үйлчилгээний байгууллагууд энэ цагийн хөгжлийн хандлагаас хоцрох гэж. Төрийн үйлчилгээний байгууллагуудад ч бас хэрэглэгч, үйлчлүүлэгчиддээ сэтгэл ханамжтай, чанартай үйлчилгээ үзүүлэх, үйлчилгээгээ олон нийтэд хүргэх оновчтой маркетинг хийх шаардлага байгаа. Энэ бүхнээс үүдэн Нийгмийн даатгалын байгууллагын соёлыг хөгжүүлэх, менежментийн чадавхийг бэхжүүлэх, удирдлага, хяналтын тогтолцоог үр ашигтай, оновчтой зохион байгуулах, нийгмийн даатгалын үйлчилгээний чанар, шуурхай, нээлттэй ил тод байдлыг хангах зорилгоор ISO 9001:2008 олон улсын стандартад нийцсэн Чанарын удирдлагын тогтолцоог нэвтрүүлэхээр шийдвэрлэсэн. УИХ-ын олон удаагийн сонгуулийн дараа байгууллагын удирдлага солигдож, шинэ удирдлага бүхэн л өөр өөрийн арга барилаараа байгууллагын үнэт зүйл, үйл ажиллагааг өөрчилдөг, хөгжлийн зүй бус хандлага манай улс оронд уламжлал болсонд харамсдаг. Мэдээж үр дүн нь эерэг ч бий, сөрөг ч бий. Гэвч байгууллагын дарга хэн байхаас үл хамааран байгууллагын соёл дээшилж, үйл ажиллагаа нь тогтвортой, үйлчилгээ нь чанартай, түншлэл хамтын ажиллагаа нь уламжлан хөгжиж байх ёстой гэж би боддог. Иймээс л чанарын удирдлагын тогтолцоог төрийн захирааны байгууллагад нэвтрүүлэхээр, хамт олноо шинэ шаардлага, сорилтод бэлтгэхээр шийдсэн.

– Чанарын удирдлагын тогтолцоог нэвтрүүлэх ажил эхлээд нилээд хугацаа өнгөрчээ. Тэгэхээр энэ хугацаанд ямар өөрчлөлт, дэвшил гарав?

Төрийн албан хаагчдын ажил үүргийн хуваарь тодорхой байж, зөв зүй зохистой удирдлагын тогтолцоог хэрэгжүүлж чадвал ажилтнуудын хөдөлмөрийн бүтээмж өндөр байна. Хөдөлмөрийн өндөр бүтээмж байх нь үйлчилгээний чанарт шууд эерэг нөлөө, үр дүнг үзүүлнэ. Манай байгууллагын ажилтнуудын ажил үүргийн хуваарь тодорхой болж, ажилтнуудын ажлын байрны тодорхойлолтыг шинэчлэн боловсруулж, мөрдөж, байгууллагын үйл ажиллагааны процессын урсгалын диаграммыг зураглаж, үйл явцын алхам бүрийг зааварчилсан ажлын заавартай,  ажлын үр дүнг хэмжих хэмжүүр нь тодорхой болсон, бүх баримт бичиг баримт, үйл ажиллаганы журам, зааврууд стандартын дагуу бэлтгэгдэн мөрдөгдөж байна. Энэ бүхний хэрэгжилтийг хянан баталгаажуулж, тасралтгүй засан сайжруулах үйл ажиллагааг хэрэгжүүлж байна. Хамт олны харилцаа, бүтээлч хандлага эерэг тал руугаа өөрчлөгдсөн. Бүгд байгууллагынхаа эрхэм зорилго, хэтийн зорилго, үнэт зүйлээ бодитоор шинэчлэн тодорхойлж, байгууллагын хөгжилд ажилтан нэг бүрийн оролцоо чухал гэдгийг ухамсарлан мэдсэн. Тэрчлэн хамт олныхоо хөдөлмөрийн бүтээмжийг дээшлүүлэх зорилготой кайзен саналын системийг “Бүтээмжийн манлайлагчдыг төрүүлнэ” уриатайгаар ажиллуулан байгууллагын ажилтан бүхэн бүтээмжийг дээшлүүлэх байгууллагаа хөгжүүлэх чиглэлээр өөрийн санал, санаачлагаа оруулах боломжтой гэх мэт үйл ажиллагаагаа илүү нээлттэй, системчлэгдсэн болсон доо. Мэдээж нэг удаагийн арга хэмжээгээр бүх асуудал шийдвэрлэгдэхгүй ч нэгэнт хүрсэн түвшинг хадгалж, цааш хөгжүүлэх шаардлага хамт олны үүрэг, хариуцлага болж байна.

-Чанарын удирдлагын тогтолцоо нэвтрүүлэхэд таны үүрэг юу байв?

Өөрчлөлтийн менежмент байхгүйгээр өөрчлөлт сайн үр дүнд хүрэхгүй нь мэдээж. Тиймээс чанарын удирдлагын тогтолцоог нэвтрүүлэх ажилд удирдлагын тодорхой дэмжлэг, оролцоо, манлайлал байж үр дүнд хүрсэн. Ажилтнууд маань өдөр тутам хийдэг ажил тусдаа, чанарын удирдлагын ажил тусдаа гэж ойлгодог байсан. Гэтэл бид одоо ердийн, өдөр тутмын ажлаа олон улсын стандартын дагуу явуулах гэж хичээж байна. Мэргэжил боловсрол, итгэл үнэмшил, хандлага, харилцааны соёлын төлөвшил, ажлын туршлагаараа эрс ялгаатай хүмүүсийг нэг зүгт чиглүүлж, нэг зорилгод хандуулахад хэцүү. Үүний төлөө бид олон удаагийн сургалт, мотиваци идэвхжүүлэлт хийсэн. Энэ бүхэнд удирдлагын хувьд миний тодорхой дэмжлэг, манлайлал, заримдаа албадлага байсан шүү. Би хийх ёстой ажлаа, хийх ёстой цагт нь л хийсэн гэж бодож байна. Одоо зогсолтгүй сайжруулах л хэрэгтэй.

-Стандарт нэвтрүүлж байгаа Нийгмийн даатгалын хэлтсүүдийг ямар шалгуураар сонгож авсан бэ? Тэдгээр нэгжид гарч буй өөрчлөлт, дэвшил юу байна?

Нийгмийн даатгалын ерөнхий газраас гадна Дорнод аймгийн нийгмийн даатгалын хэлтэс, Хан-Уул дүүргийн нийгмийн даатгалын хэлтсүүд олон улсын чанарын удирдлагын тогтолцоо ISO 9001:2008 стандартыг нэвтрүүлэхээр шийдвэрлэсэн. Нэгжүүдээс бид Нийслэлийн нэг дүүргийн мөн орон нутгийн нэг аймгийн хэлтсийг сонгож авсан юм. Аль ч түвшинд бид стандартын дагуу үйл ажиллагаа явуулах ёстой, ийм боломжтой гэдгийг харуулахыг зорьсон. Энэ зорилго маань ч биеллээ. Зөвхөн энэ байгууллага төдийгүй манай бүх аймаг, дүүргийн нийгмийн даатгалын хэлтэс дээр өөрчлөлт хийгдэж байгааг та бүхэн харж болно. Ажлын байрны эмх цэгц, өнгө зүснээс авахуулаад баримт бичиг боловсруулалт, ажилтнуудын хандлагад ч бодит өөрчлөлт гарсан.

-Нийгмийн даатгалын байгууллага төрийн үйлчилгээг иргэд даатгуулагчдад хүргэж буй үйлчилгээний байгууллага. Тэгвэл Чанарын удирдлагын тогтолцоог нэвтрүүлснээрээ танай үйлчлүүлэгчдэд, даатгуулагч, хамтран ажиллагч түншүүдэд ямар давуу талтай, үр ашигтай байх вэ?

Олон улсын байгууллагууд, судалгааны сангууд, арилжааны банкууд, эрүүл мэндийн байгууллагууд, Засгийн газрын бүтцийн байгууллагууд гээд манай салбарын гадаад, дотоодын түншлэгч байгууллагуудын хүрээ өргөн. Энэ бүх түншүүдтэй харилцах хэвийн үйл ажиллагаанд удирдлагын үзэл бодол, хандлагаас хамаарч саад учирч болохгүй. Тиймээс түншлэл хамтын ажиллагаа эрхэмлэхийг үнэт зүйлээ болгосон. Мөн нийгмийн даатгалд даатгуулагч, ажил олгогчдын маань сэтгэл ханамж хамгаас чухал. Бид давхардсан тоогоор 5 сая даатгуулагчид үйлчилгээ хүргэдэг. Бидний ажил тэдгээр даатгуулагчийн сэтгэл ханамжаар үнэлэгдэнэ. Иймээс бид сэтгэл ханамжийн судалгааг олон чиглэлээр,  бүлэглэн хийж, гарсан үр дүн дээр дүгнэлт хийн үйл ажиллагаагаа сайжруулахыг эрхэмлэж байна.

-Саяхан танай байгууллагад олон улсын түвшний баталгаажилт хийх аудитын баг ирсэн гэсэн. Монгол улсын нийгмийн даатгалын үйлчилгээнд тэдний өгсөн үнэлэлт дүгнэлт сонин байна?

-Олон улсын түвшинд чанарын удирдлагын олон улсын стандартын хэрэгжилтийн байдалд аудит хийх итгэмжлэгдсэн байгууллага болох “Hongkong veritas” компанийн тэргүүлэх аудитор Камилле Пүүн, Катрине Kвок нар хүрэлцэн ирж Нийгмийн даатгалын байгууллагын чанарын удирдлагын тогтолцоонд анхдугаар шатны болон хоёрдугаар шатны аудит хийсэн. Нийгмийн даатгалын байгууллагын удирдлагын бүтээлч байдал, ажилтнуудын идэвх санаачлага онцгой сайн байгааг үнэлж, дурьдсан. Азийн олон оронд аудит хийж байсан ч  ийм сайн туршлага ховор гэдгийг онцолсон. Чанарын удирдлагын тогтолцоо нэвтрүүлснээр олон дэвшилт гарсныг дурдаад бас хэд хэдэн чиглэлээр зөвлөмж өгснийг бид засаж сайжруулж байна. Бүхэлдээ төрийн үйлчилгээнд шинэ соёл, шинэ хандлага төлөвшүүлэхийг зорьсон маань олон улсын аудитын үнэлгээгээр сайшаагдлаа.

-Нийгмийн даатгалын байгууллагын дараагийн шинэ санал, санаачлага юу байх бол? Мөн удахгүй шинэ он гарах гэж байна. Ирэх жилд хийхээр төлөвлөсөн ажлаасаа танилцуулаач?

Бид “Нийгмийн даатгалын байгууллагын хүний нөөцийн менежментийг сайжруулах” төслийг Германы олон улсын хамтын ажиллагааны нийгэмлэгтэй хамтран хэрэгжүүлж, Нийгмийн даатгалын байгууллагын хүний нөөцийн өнөөгийн байдлыг үнэлэн “Ажлын байрны тодорхойлолт” “Гүйцэтгэлийн үнэлгээ”, “Албан тушаал дэвших тогтолцоо”, “Сургалт-хөгжил”-ийн тогтолцоог сайжруулах чиглэлд ахицтай ажиллаж байна. Төрийн албаны зөвлөлөөс энэхүү төслийн үйл ажиллагааг сайшаан дэмжиж цаашид улсын хэмжээнд авч хэрэгжүүлэх боломжтой гэдгээ мэдэгдсэн. Энэ төсөл маань үргэлжлэх болно. Мэдээж Олон улсын стандартад нийцүүлэн чанарын удирдлагын тогтолцоогоо бэхжүүлж, үйлчилгээ үзүүлж, үйл ажиллагаа явуулна гэдэг ганц гэрчилгээ аваад болчихдог хэрэг биш болохоор үйл ажиллагаагаа тасралтгүй сайжруулж даатгуулагчдынхаа итгэл найдвар, сэтгэл ханамжаар үнэлэгдэх нийгмийн даатгалын цогц үйлчилгээ үзүүлэхийн төлөө хичээж ажиллах болно.

Шинэ он манай хамт олны байгууллагын түүхэнд ул мөрөө үлдээх олон сайн үйлсийн жил байна гэдэгт эргэлзэхгүй байна.

Ярилцсанд баярлалаа. Ажлын амжилт хүсье.

Баярлалаа, Та бүхэнд болон танай сонины уншигчдад амжилт, эрүүл энх, сайн сайхныг хүье.