Өнөөдөр тусгаар тогтнолын талбайд нээлтээ хийсэн “Хөдөлмөрийн аюулгүй байдал, эрүүл ахуйн сарын аян”-ы өдөрлөгт Нийгмийн даатгалын ерөнхий газрын мэргэжилтнүүд оролцож, иргэд даатгуулагчдад мэдээлэл, зөвлөгөө өгч ажиллаа.
Олон улсын хөдөлмөрийн байгууллагаас жил бүрийн дөрөвдүгээр сарын 28-ны өдрийг “Хөдөлмөрийн аюулгүй байдал эрүүл ахуйн дэлхийн өдөр” болгон зарласан ба манай улсын тухайд хөдөлмөрийн аюулгүй байдал, эрүүл ахуйн хууль тогтоомж, стандартыг мөрдүүлэх ажлыг улсын хэмжээнд шинэлэг арга хэлбэрээр зохион байгуулах, идэвхижүүлэх, аюул ослоос урьдчилан сэргийлэх мэдлэг, дадлыг иргэдэд олгох аяныг долоо дахь жилдээ улсын хэмжээнд өрнүүлж байна.
Тус аянд Хөдөлмөр нийгмийн хамгааллын яам, Хөдөлмөрийн аюулгүй байдал, эрүүл ахуйн үндэсний хороо, Мэргэжлийн хяналтын ерөнхий газар, Нийгмийн даатгалын ерөнхий газар, Хөдөлмөрийн аюулгүй байдал эрүүл мэндийн төв, Монголын үйлдвэрчний эвлэлийн холбоо болон Монголын ажил олгогч эздийн нэгдсэн холбоо зэрэг мэргэжлийн байгууллагууд нэгдэн оролцож байгаа юм.
