Сэтгүүлч, хэвлэл мэдээллийн ажилтнуудад нийгмийн даатгалын мэдлэг олгох, мэргэшүүлэх, нийгмийн даатгалын тухай хууль тогтоомжийг сурталчлах зорилгоор Эрүүл мэнд, нийгмийн даатгалын байгууллагаас жил бүр сургалт зохион байгуулдаг уламжлалтай. Энэ жилийн тухайд “Нийгмийн даатгал-Таны насан туршийн баталгаа” сэдвийн дор зохион байгуулж олон нийтийн мэдээллийн хэрэгслийн 25 сэтгүүлчийг хамруулсан юм.

Сургалтыг Эрүүл мэнд, нийгмийн даатгалын ерөнхий газрын нийгмийн даатгалын асуудал хариуцсан дэд дарга Г.Саран нээж, Монгол Улсын нийгмийн даатгалын тогтолцоо, Эрүүл мэнд, нийгмийн даатгалын байгууллагын чиг үүрэг сэдвээр  Нийгмийн даатгалын бодлогын хэрэгжилт, судалгааны газрын дарга Ц.Ганцэцэг, Нийгмийн даатгалын тухай ойлголт, Нийгмийн даатгалын үйлчилгээний төрлүүд сэдвээр Нийгмийн даатгалын үйлчилгээ хөгжүүлэлтийн хэлтсийн дарга М.Гэрэлмаа, Нийгмийн даатгалын шинэчлэл, хуульд орсон нэмэлт өөрчлөлтүүдийн талаар Нийгмийн даатгалын бодлогын хэрэгжилт, судалгааны газрын ахлах мэргэжилтэн С.Лхагвадорж нар илтгэл танилцуулж, мэдээлэл өглөө.

Сургалтын төгсгөлд Эрүүл мэнд, нийгмийн даатгалын ерөнхий газрын дарга Д.Зоригт сүүлийн үед хийгдэж буй ажлаа тоймлон танилцуулж, сэтгүүлчдийн сонирхсон асуултад хариулан чөлөөт ярилцлага өрнүүллээ.

Сэтгүүлчдийн тухайд нийгмийн даатгалын талаар системтэй мэдлэг олгодог тус сургалтад тогтмол хамрагдах хүсэлтэй байгаагаа илэрхийлсэн бөгөөд гурав дахь жилдээ зохион байгуулагдсан тус сургалтад тасралтгүй хамрагдсан сэтгүүлч нар ч цөөнгүй байсан юм.

 

ЭРҮҮЛ МЭНД, НИЙГМИЙН ДААТГАЛЫН ЕРӨНХИЙ ГАЗАР